Vo Fort William nach Gairloch über Umwäge

Am nächste Morge heimer früeh los müesse, wüu d Bsitzer vom Hotel üs scho vorgwarnet hei, es heig de viu Bousteue ungerwägs und wenn mir d' Fähri uf Isle of Skye wei verwütsche, müessi mir e Umwäg fahre.. Ja, ja, mir luege de..!

Mir si, entgäge der Empfählig aso gliich di ursprünglechi Route gfahre: Fort William u när links richtig Mallaig, womer uf d Fähri hei müesse. Es het würklech viu Bousteue gha so mit eispurig fahre und Rotliecht u so. Aber mir si rächt guet ir Zyt gsi. Aber vor luter herrjeses heimer sogar der berüehmt See us de Harry Potter Fiume verpasst (Loch Shiel).. so doof! Aber zum Ahaute und id Gägend useluege hättis leider eh nid glängt. D Strecki isch am Afang wider sehr schön gsi, viu See, saftigi Natur, Blüemli aber gäge Schluss, das isch irgendwie komisch, wüu me ja eigentlech ads Meer fahrt, isch me wider vou i de Bärge in. U di Hügle si vou gäub blüeiendem Ginster gsi. So schön!

Schlussändlech simer ömu de rächtzytig bi der Fähri ds Mallaig acho und glücklecherwiis heimer üsi Tickets scho gha, d Warteschlange isch nämlech läng gsi. D Überfahrt isch churz gsi und uf der Insle isch schöns Wätter gsi. Da simer grad mau chli ga cache. Es het e Robbe-Beobachtigspunkt, womer unbedingt hei wöue ga luege. Es isch e churzi Wanderig dürne Waud, wo vo Ökocamper ungerhaute wird (Ökocamping wird NIEMAUS uf mire Ferieliste stah.. o nid Camping ohni Öko!) Mir si aso bi däm Beobachtigspunkt acho aber leider hei sech die Robbe nid zeigt. Schiins hei si nid gärn, wes luftet... 

Eigentlech hätte mer nume churz söue uf Isle of Skye blibe und när über d Skye Bridge wider uf ds Festland fahre. Mir heinis aber derfür entschide, dass mer der Houptort Portree no wei ga bsueche. Das si nomau guet 120 km meh aber es het sech glohnt.

 

Dert söts itz äbe Robbe ha

höch obe über Portree

U hie verstecke sech aube d Hobbits...

 

D Stedtli isch vou touristisch aber härzig. Es het cooli Lädeli und i ha sogar ines paari inedörfe.. Vor auem im Seifelädeli hets mi fasch umghoue und i hami müesse zrügg haute, dass i nid viu z viu iikouft ha!

Aschliessend simer wider zrügg gfahre und über d Skye Bridge uf ds Festland übere. Mir hei e churze Abstächer gmacht zum Eilean Donan Castle, ds meistfotografierte Schloss in Schottland, oder so.  Sehr berüehmt o aus Filmkulisse, wobii mir di Fiume gloub bis itz nie si ungercho.. jänu!

Das isches! Meistens wirds vor angere Site gfötelet

Dä Bueb da isch ganz gwinnträchtig vor ds Schloss gstange und het brav eis gflötlet.

Mir hei aber ging no e längi Strecki vor üs gha und usserdäm ging no es paar Gheimnis am Outo, womer no nid glöst hei.. zum Bispiu: wie tuet me der Kofferruum korrekt uf?! Aber meh zu däm speter.

Mir si när witer nördlech gfahre, üses Ziel isch hütt Gairloch gsi. Es chlises Käffli am Strand, juppiie!

Gäge Aabe simer de dert acho, hei d Ungerkunt inspiziert (di schlimmsti uf üsem ganze Tripp) und si no chli a Strand ga spaziere. 

Dert am Strand entlang isch übrigens ono grad e Golfplatz gsi.. so schön!

Me het richtig Feriegfüeu bercho a däm schöne Ort

 U wüus i däm munzige Dörfli nid viu meh het gha aus öppe füf Hüsli, e Goufplatz und zwöi Hotel, simer haut de früeh ga lige und heinis ufe nächst Tag gfröit!

Üsi Schottland-Rundreis

Ui es isch lang här, dass i z letscht Mau öppis ha gschribe hie! Der Grund isch entweder, dass es nüt z schribe git wüu nüt louft, oder me het so viu z tüe, dass me nid derzue chunnt! I gloub, es isch e chli beides. Zersch bini wider ir Schwiz gsi und woni bi zrügg cho, bini gloub grad umgehend i Winterschlaf gheit.. scho wider! Ir Schwiz bi 18°C abgfloge u hie im Tiefschnee glandet - mängisch weissi nid, werum ig hie wohne!

Eh nu, irgendeinisch afang Mai isch de dä Schnee o wäg und mir si id Ferie. Da mir sit drü Jahr ging nume Finnland-Schwiz greist si, heimer wider mau chli öppis angers wöue gseh und hei üs für Schottland entschide. Drum wärde die nächste Iiträg hie vo üsne Ferie verzeue.

Agfange het aus in Edinburgh, womer mit viu Verspätig zmitts ir Nacht mau si acho. 

Mir si nid truurig gsi, dass es so spät isch, vor auem dr Anders nid. Dä het nämlech müesse fahre und das uf der fausche site im Outo uf der fausche Site uf der Strass. Aber Bifahrer si isch im fau o nid lustig!! U nachdäm mir bim Mietoutodepot füf Minute hei probiert, üses Outo ufztue mit em Schlüssu, heimer gmerkt, dass mer näbem fautsche Outo stöh u ir Reihe witer hinger eis Outo ging uf u zue geit.. Zum Glück isch z mitts ir Nacht gsi u es het keni Lüt gha! (Es het mi sowieso verwungeret: es Cabrio hani nämlech nid wöue)

Nachere churze Nacht simer de am nächste Morge, gstercht mit emne schottische Zmorge, wo eim nach em dritte Tag zum Haus us hanget, losgfahre richtig Fort William. 

I hätt gärn eine mitgno, was d' hesch, das hesch! Aber dä när e Wuche hinger im Outo ha...

Mir si auso irgendwie us dere Stadt usegfahre. Mini Ufgab isch gsi, der Anders dra z erinnere, dass mer links müesse fahre u gliichzytig hani o müesse Charte läse. Nid eifach, aber nach emne Zytli het me sech dra gwöhnt und me cha d Umgäbig gniesse. Dr erst Stopp heimer in Sterling gmacht, womer si ga ds Schloss aluege, oder äbe nume grad vorusse. Irgendwie heimer nid so Lust gha, bi jedem Schloss 15.- Iitritt z zahle. U mir hei ja o witer müesse, damit mir de rächtzytig am Ziel achöme.

Ds Sterling Castle vor Outobahn us

Ds Coole isch, dass me irgendwo imene saftig grüene Waud fahrt u plötzlech, so het me z Gfüeu, isch me i de Bärge i karger Landschaft.

Gäge Aabe simer in Fort William achoo, natürlech wie immer z spät zum ga shoppe, da mir ungerwägs ging wider hei müesse ahaute zum geocache.

Mir si aber de glich no i das härzige Stedtli und hei imene Spunte Znacht gässe. Am Tisch näbedran isch e riese Gruppe Harley-Davidson-Fahrer ghocket, äuä irgendwo usem Oberaargou. U das isch ds erst und ds letscht Mau gsi, womer Schwizer hei gseh uf dere Reis.

In Fort William

Fueter für e Winterpeuz

Eini vo de Houpttätigkeite im Winter isch ja bekanntlech ässe. Schliesslech muess me bi dere Cheuti ds "Winterfääli" fuetere und es dünkt mi, das göng am beste mit emne feine Täuer Spaghetti (mau chli ufene angeri Art)

Basilikum-Spaghetti mit überbachne Tomate

500 gr Spaghetti (für ds schlächte Gwüsse darfme o gärn Vouchorn-Spaghetti näh)

50 ml Oliveöl 

Salz und Pfäffer

3 Chnoblouchzäie, presst

e haube Teelöffu verdrückte rote Pfäffer

e gueti Handvou Basilikumblettli

für d Tomate:

5 grossi Tomate, quer i 5mm-Schibe gschnitte

e haubi Tasse Paniermähl

60 gr gribne Parmesan

2 Ässlöffu Oliveöl

1 Chnoblouchzäie, presst

Basilikumblettli nach Beliebe

Salz und Pfäffer

E grosse Topf mit Sauzwasser übertue u der Ofe uf 200°C vorheize. 

Ds Paniermähl mit em Parmesan, Oliveöl, Chnoblouch, Basilikum, Sauz und Pfäffer mische.

D Tomateschibe ufenes griuelets u gfettets Bachbläch lege, d Paniermäumischig glichmässig uf de Tomateschibe verteile, e chli Oliveöl drüber gä und ab i Ofe dermit (öppe 10 Minute oder bis ds Paniermäu liecht Farb animmt.)

Während d Spaghetti am choche si, wärde inere Bratpfanne scho mau dr Chnoblouch u der rot Pfäffer i wenig Oliveöl adünstet. D Pfanne aschliessend vom Herd näh. 

We d Pasta al dente kochet si, entnimmt me 3.5dl vom Spaghettiwasser und giesst d Spaghetti aschliessend ab. 

Itz git me se id Bratpfanne, wo Chnobli und Pfäffer am warte si, mischt aues guet, git Basilikum, Öl, Parmesan, Sauz und Pfäffer derzue und soviu Spaghettiwasser, dass es e cremigi Sauce git. 

D Spaghetti uf Täuer verteile und es paar Tomateschibe usem Ofe uf d Pasta lege. Wär wott, cha no meh Parmesan drüber streue. U när cha eifach Jede mit der Gable d Tomate verdrücke und unger sini Spaghetti mische.

Di Spaghetti chame übrigens o ganz guet im Summer ässe. Denn brucht me de eifach e angeri Entschuldigung... 



inspiriert dür www.circle-b-kitchen.com, aapasst nach mim Gschmack.

Es Apérohäppli zum Neujahr!

Ja i weiss, es isch lang här, dass i z letscht Mau gschribe ha. I bi im Novämber ir Schwiz gsi und ha eifach ke Zyt gha, näbem Schaffe, Geocache und Fründe träffe ono z blogge. U dr Dezämber isch ging wi ging: Es het viu z weni Tage für so viu z tüe. 

Aber itz bini (churz) zrügg und wett öich aune nomau es guets Nöis wünsche. U da derzue ässe mer ds fougende Apérohäppli:


Crostini mit caramelisierte Zibele, Pecorino und Salbei

Es brucht:
  

• 1 Baguette oder Ciabatta, schreg i Schibe gschnitte
• Oliveöl
• 3 grossi, gäubi Zibele, i Ringe gschnitte (das isch e gueti Ufgab füre Commis)
• 1 EL bruune Zucker 
• Wasser
• 1 EL Balsamico oder Balsamicoessänz (je nachdäm, was me deheim het)
• e haube Kafilöffu Sauz
• 2 EL früsche Salbei, i Streife gschnitte
• öppe 80-100 gr Pecorino Romano

Zersch heizt me der Ofe vor uf 175 Grad.
 
D Brotschibe mit Oliveöl beträufle und im warme Ofe ca. 5 Minute knusprig bache. Use näh und uf d Site steue.
När e chli Oliveöl inere wite Pfanne erhitze u Zibele drin weich choche (nid brätle); das geit öppe e Viertustung. 

Itz tuet me dr bruun Zucker derzue und deckt d Pfanne zue und chochet aus nomau öppe 20 Minute, bis d Zibele schön goldig-bruun si. Zwüschine muess mes e chli rüere.

Itz git me öppe e haube Deziliter Wasser derzue und chochets nomau e Viertustung, bis d Zibele no es bitzi goldiger si (am beste trinkt me fang es Apéro zur Vorbereitig)


Wes de sowit isch, isches Zyt füre Balsamico, ds Salz, der Salbei u nomau e haube Dezi Wasser. Nomau la chöchele, bis aui Flüssigkeit verschwunde isch. D Pfanne aschliessend vom Herd näh.

D Zible verteilt me itz gerächt uf d Brotschibe u leit obedruf es dünns Schibli vom Pecorino. Im Ofe tuet mes itz nume no überbache - so lang, bis der Chäs langsam faht afa schmeuze. Usenäh, mit Salbei bestreue und serviere.

U am beste het me im Tiefchüeler no chli Ufbach-Apérohäppli. Es chönnt nämlech guet si, dass d Crostini scho gässe si, bevor der Bsuech iitrifft... 

Es sagehafts Güezi

Am Sunnti fiire mer am Jakob si Geburi und hei Grosseutere und so iiglade. Das isch doch di ideali Glägeheit, die grad aus Versuchskaninchen z missbruche! 


U zwar müesse si Chocolate Caramel Slice probiere. Das isch es extrem kaloriearms Güezi, wo in Oustralie sehr beliebt isch. U da ig nid ha gwüsst, obs mir de o glingt, hanis scho gester Abe gmacht, me chas nämlech guet es paar Tag im Chüeuschrank ufbewahre. Und eso geits:



Chocolate Caramel Slice


E Bachofeform, ca. 20x25 cm mit Bachpapier uschleide. Dr Ofe uf 180°C vorwerme.

110 g Farinzucker (so bruun u gseht us, aus würd er läbe)
60 g Kokosrasple
100 g Mäu
1 TL Bachpulver
1/2 TL Natron
85 g gschmouzne Anke 


Aus inere Schüssle guet Mische und die Masse aschliessend ir Bachofeform gliichmässig verteile. Mit de Finger guet adrücke. Im Ofe ir Mitti während 10-12 Minute bache, bises liecht dünkler wird. Usenäh und es bitzeli la abchüele.


Während dere Zyt wird ds Caramel gmacht. 

30 g Anke

2 EL Goldige Sirup (weme das nid fingt ir Schwiz, söts o mit Melasse oder Ahornsirup ga)

400 g (1 Büchsli) zuckereti Kondensmilch


Anke und Sirup/Melasse inere Pfanne erwärme, Kondensmilch derzue gä und während öppe 10 Minute unger rüehre choche, bis d Masse dicker wird.


Ds Caramel ufem vorbachne Bode gliichmässig verteile und nomau für öppe 10 Minute i Ofe schiebe. Ds Caramel sött liecht Farb anäh. När laht mes uf Zimmertemperatur la abchüele.


Für die letschti Lag nimmt me 150 g dunkle Schoggi oder o mit Miuchschoggi gmischt, ganz wimes gärn het und schmeuzt dä langsam (damits sicher glingt, chame chli Anke derzue gä) und verteilt när di flüssigi Schoggi ufem Caramel. 

När steut me d Form eifach mau über Nacht i Chüeuschrank, o weis eim furchtbar glustet!

so gsehts am nächste Tag us

Zum Serviere nimmt mes us der Form und Schnits mit emne scharfe Mässer i chlini Stück. Da derzue wermt me z Mässer i heissem Wasser u tröchnets ab. U das macht me für jede Schnitt. 

I bi gspannt, obi miner bis am Sunnti cha vom Anders fernhaute...

Es wird ging besser!

I weiss, i weiss, es isch bereits der dritt Iitrag zu Polarliechter, aber es wird eifach jede Tag besser. Einersits chumeni bir Kamera de öppe chli drus und anderersits wärde d Polarliechter zuenähmend stercher.

Drum hie nomau es paar Biudli, dasmau nüt am Computer bearbeitet, sondern eifach so dusse gfötelet (me cha sech optional derzue o vorsteue, dass ig im Pischi dusse stah, mängisch d Chnöpf ar Kamera vor luter Schlottere fasch nid cha drücke und der Leo um ds Stativ umestriicht u dran waggelet...)

 

Ufem mittlere Biud gseht me, dass ds Polarliecht sech unger rötlech verfärbt. Es isch när wine Wäue vo links nach rächts düregange. D Farbe chöme dür das z stang, dass dr Sunnewind Atom ir Atmosphäre aregt. U de chunnts druf a, i welere Höchi das passiert. Es Polarliecht in Mittueuropa isch zum Bispiu meistens nume rot. I de Polarregione chas aber o grüen, violett oder blau si. 
Irgendeinisch bringeni de d Nachbare no derzue, ihri Lampene ir Nacht abzlösche...

Itz isch gange!

Si hei mer eifach ke Rueh gla, die cheibe Polarliechter und so hani mi müesse mit der Bedienigsaleitig vo mire Kamera usenangsetze.. (i lise NIE Bedienigsaleitige!) u die isch so eeewig läng u so vou vo Wörter, wo mir nüt säge.. i ha de e Fachmaa kontaktiert, wo chürzlech grad vo Island isch zrügg cho und der Polarliechter gfötelet het. Es hets nid viu vereifacht, aber wenigstens hani gwüsst, nach was ig muess sueche und bi de o glii ad Gränze vo mire Kamera gstosse. 

Leider isches mit däm nid gmacht gsi und i ha di verschidene Läde müesse nach Stativ dürsueche: da gits itz aus, vo 15 Euro bis 300 Euro...

Guet, schlussändlech hani aus binenang gha, d Kamera sowit wie müglech iigsteut u när hani müesse warte... es het äuä no nie so viu grägnet u Wulche gha.

Am Samsti Abe hets aber de zimlech viuversprächend usgseh. Ds Spaceweather Forecast het gseit, es sig mit Polarliechter z rächne und Vasa isch o im richtige Gebiet gläge. I bi ganz tigerig gsi, ging wider use ga luege, d Kamera scho ufem Stativ und iisatzbereit. Dr Anders isch fasch wuschig worde ab mir. 

Aber i gloub, es het sech glohnt :-))

D Föteli si no wit entfernt vo "perfekt". Das wird ersch mit meh Üebig unere bessere Kamera müglech.