Es sagehafts Güezi

Am Sunnti fiire mer am Jakob si Geburi und hei Grosseutere und so iiglade. Das isch doch di ideali Glägeheit, die grad aus Versuchskaninchen z missbruche! 


U zwar müesse si Chocolate Caramel Slice probiere. Das isch es extrem kaloriearms Güezi, wo in Oustralie sehr beliebt isch. U da ig nid ha gwüsst, obs mir de o glingt, hanis scho gester Abe gmacht, me chas nämlech guet es paar Tag im Chüeuschrank ufbewahre. Und eso geits:



Chocolate Caramel Slice


E Bachofeform, ca. 20x25 cm mit Bachpapier uschleide. Dr Ofe uf 180°C vorwerme.

110 g Farinzucker (so bruun u gseht us, aus würd er läbe)
60 g Kokosrasple
100 g Mäu
1 TL Bachpulver
1/2 TL Natron
85 g gschmouzne Anke 


Aus inere Schüssle guet Mische und die Masse aschliessend ir Bachofeform gliichmässig verteile. Mit de Finger guet adrücke. Im Ofe ir Mitti während 10-12 Minute bache, bises liecht dünkler wird. Usenäh und es bitzeli la abchüele.


Während dere Zyt wird ds Caramel gmacht. 

30 g Anke

2 EL Goldige Sirup (weme das nid fingt ir Schwiz, söts o mit Melasse oder Ahornsirup ga)

400 g (1 Büchsli) zuckereti Kondensmilch


Anke und Sirup/Melasse inere Pfanne erwärme, Kondensmilch derzue gä und während öppe 10 Minute unger rüehre choche, bis d Masse dicker wird.


Ds Caramel ufem vorbachne Bode gliichmässig verteile und nomau für öppe 10 Minute i Ofe schiebe. Ds Caramel sött liecht Farb anäh. När laht mes uf Zimmertemperatur la abchüele.


Für die letschti Lag nimmt me 150 g dunkle Schoggi oder o mit Miuchschoggi gmischt, ganz wimes gärn het und schmeuzt dä langsam (damits sicher glingt, chame chli Anke derzue gä) und verteilt när di flüssigi Schoggi ufem Caramel. 

När steut me d Form eifach mau über Nacht i Chüeuschrank, o weis eim furchtbar glustet!

so gsehts am nächste Tag us

Zum Serviere nimmt mes us der Form und Schnits mit emne scharfe Mässer i chlini Stück. Da derzue wermt me z Mässer i heissem Wasser u tröchnets ab. U das macht me für jede Schnitt. 

I bi gspannt, obi miner bis am Sunnti cha vom Anders fernhaute...

Es wird ging besser!

I weiss, i weiss, es isch bereits der dritt Iitrag zu Polarliechter, aber es wird eifach jede Tag besser. Einersits chumeni bir Kamera de öppe chli drus und anderersits wärde d Polarliechter zuenähmend stercher.

Drum hie nomau es paar Biudli, dasmau nüt am Computer bearbeitet, sondern eifach so dusse gfötelet (me cha sech optional derzue o vorsteue, dass ig im Pischi dusse stah, mängisch d Chnöpf ar Kamera vor luter Schlottere fasch nid cha drücke und der Leo um ds Stativ umestriicht u dran waggelet...)

 

Ufem mittlere Biud gseht me, dass ds Polarliecht sech unger rötlech verfärbt. Es isch när wine Wäue vo links nach rächts düregange. D Farbe chöme dür das z stang, dass dr Sunnewind Atom ir Atmosphäre aregt. U de chunnts druf a, i welere Höchi das passiert. Es Polarliecht in Mittueuropa isch zum Bispiu meistens nume rot. I de Polarregione chas aber o grüen, violett oder blau si. 
Irgendeinisch bringeni de d Nachbare no derzue, ihri Lampene ir Nacht abzlösche...

Itz isch gange!

Si hei mer eifach ke Rueh gla, die cheibe Polarliechter und so hani mi müesse mit der Bedienigsaleitig vo mire Kamera usenangsetze.. (i lise NIE Bedienigsaleitige!) u die isch so eeewig läng u so vou vo Wörter, wo mir nüt säge.. i ha de e Fachmaa kontaktiert, wo chürzlech grad vo Island isch zrügg cho und der Polarliechter gfötelet het. Es hets nid viu vereifacht, aber wenigstens hani gwüsst, nach was ig muess sueche und bi de o glii ad Gränze vo mire Kamera gstosse. 

Leider isches mit däm nid gmacht gsi und i ha di verschidene Läde müesse nach Stativ dürsueche: da gits itz aus, vo 15 Euro bis 300 Euro...

Guet, schlussändlech hani aus binenang gha, d Kamera sowit wie müglech iigsteut u när hani müesse warte... es het äuä no nie so viu grägnet u Wulche gha.

Am Samsti Abe hets aber de zimlech viuversprächend usgseh. Ds Spaceweather Forecast het gseit, es sig mit Polarliechter z rächne und Vasa isch o im richtige Gebiet gläge. I bi ganz tigerig gsi, ging wider use ga luege, d Kamera scho ufem Stativ und iisatzbereit. Dr Anders isch fasch wuschig worde ab mir. 

Aber i gloub, es het sech glohnt :-))

D Föteli si no wit entfernt vo "perfekt". Das wird ersch mit meh Üebig unere bessere Kamera müglech.

Hotel Isabel

Ändlech hani o eis: Es Wiudbienihotel! 

Mir hei so viu Hummeli, Beieli u Insekte i üsem Garte (nid nume Mugge..), dass i eifach ha müesse sone Biendlihotel ha. Dr Plan het eigentlech scho lang existiert, aber ar Usfüehrig hets no ghapperet. 

Mitti Ougust hets aber kes Entrinne me gä und i ha der Bou am Anders i Uftrag gä. Aso vor auem der Rahme het är mir müesse zämebastle, der Räst hani de fasch allei gschafft, nachdäm me mir d Bormaschine usfüehrlech erklärt het. 

Ds Bier isch NID Teil vom Projekt...

Wichtig isch ja, dass di verschide grosse Insekte verschide grossi Löchli hei, wo si de ihri Eier chöi dri lege. U di Löchli si am beste i verschidene Houzrugle aber o i hohle Pflanzestängle und Bachsteine. Es isch fasch e chli wines Boutique-Hotel, wo jedes Zimmer angers usgseht..


E Platz isch de o schnäu gfunge gsi, nachdäm mir üs schlau gmacht hei, i weli Himmusrichtigs das Ding sött hange u i welere Umgäbig dasses genähm wär. 

Es si no nid aui Zimmer fertig, aber der Umbou vom Schwizerhof het schliesslech o lenger duuret..

Vor dran hani itz mau no Pflanzesämli gstreut, damit de die Tierli im Früehlig o aständig z ässe hei und itz blibt mer nüt Angers übrig, aus ar Reception z stah u di Zimmer z vermiete... natürlech ohni Roomservice u putzt wird o säuber!

Polarliechter? Polarliechter!!

I weiss nid, wie mängisch dassi scho bi voruse gstange u ha uf Polarliechter gwartet. Entweder isches soumässig chaut gsi und i bi nach füf Minute wider ine, oder de isches bewöukt gsi oder z häu oder es het eifach keni gha... es isch zum verzwiifle! 

Gester Abe hani dänkt:" So i gibenim no mau e Chance, schliesslech hets gheisse, das Wuchenänd chönn me mit höcher Aktivität rächne". Am haubi eis, woni ha zum Fänster us gspienzlet und hets mi dünkt, es sig so komischi Wulche am Himmu, sones Gschlirgg.  Ig auso use, im Pyjama u blutte Füess, uns siehe da: Polarliechter!! I bi ganz usem Hüsli gsi und bi sogar dr Anders ga wecke u der Leo het o grad nüm chönne schlafe und isch mit mer voruse gstange. Auerdings het dr Mond sehr häu gschune und es isch nid so richtig intensiv grüen gsi, ender so es bitzi grüenlech-rötlech-wiisslech. Aber so bini öppe e Stung dusse gstange (i ha de nachemne Zytli no chli meh Chleider aagleit) und ha däm Gschehe zuegluegt. Es isch auso schono iidrücklech, wies so am Himmu pulsiert und wäuelet. När hets aber de langsam naagla und es isch näblig worde, de bini haut de gliich ga lige. Aber da d Sunneaktivität sech ufnes Maximum zuebewegt, chöimer das Spektakel i nächster Zyt sicher no öfter gniesse.

U wenni itz de no usegfunge ha, wie mi Fotoapparat RICHTIG funktioniert und i de no es Stativ kouft ha, probiereni de das Ganze o mau z fötele...

Ds ganze Jahr Ostere!

Im Juli heimer Fründe aus der Schwiz z Bsuech gha und mit dene isch ono grad es nöis Hobby bi üs acho: ds Geocaching!

Dert geits drum, dass me im Gländ ahand vo Koordinate geit ganes Truckli sueche, dert när si Name dri schribt u sech dran fröit! Mängisch hets o schöni Sache i däm Truckli u de chame öppis tuusche. 

Da gits o Lüt, wo ihri auti Mikrowäue aus Cache witerverwände..

 

Mir si erstuunt gsi, wie viu so Truckli dasses bi üs um ds Huus ume het u die heimer o grad aus ersts gsuecht. Het sicher super usgseh, sächs Lütt, wo im Ungerhouz umenuele oder ratlos id Böim ufeluege... aber es macht nüt, dr Usländerstämpu hani ja eh scho ufdrückt!

U mit zwe ambitionierte Männer muess me o di fasch unzuegängleche Caches ga sueche: die, wome nume mit em Boot härechunnt. U de isches so, dass ds Wasser ender seicht isch, es wimmlet vo grosse Steine u d Männer si liecht aggressiv-närvös, wüu me dert muess ds Boot düre manövriere. När, wemes de ändlech het gschafft, bringt me der dr Anker nüm unger de Chempe füre u es wird nomau gfluechet.. het üs Froue aber nid gstört, MIR ja nid dert häre wöue... :-)

Äbe det, rächts äne isches. Aber zersch muess me no d Chempe hinger sech bringe!

Und i übertriffe mi regumässig säuber, i däm ig mini Finger i züg inne ha, woni süsch NIEMAUS würd drilänge.. aber es het hie eifach nid so viu Viecher wie ir Schwiz...

U itz isches so, dass mer öppe am Abe u vor auem am Wuchenänd gö ga cache. Nadisna finge merr o use, was mer no so für Usrüschtig bruuche: Rägehose (wes eifach wie us Chüble schiffet und me naiverwiis deheim het entschide, das geit de nid so lang u mir wärde nid so nass, ume när mit pfludinasse Jeans dür ds höche Gras muess loufe), Gummistifle (dito), Taschelampe, Gartehändsche (ganz wichtig, für überau dert inezlänge, wo me süsch äbe nid würd) und natürlech e Maa, wome überau cha ine-, drunger- u drufschicke, wome säuber lieber nid wett..

zum Bispiu dert ine...

Aber Aus i Auem isches würklech fägig (wes nid grad vo Mugge oder Euchflöige wimmlet) und me gseht Sache und Orte, wome süsch nid würd gseh!

Üsi Truckli-Truppe.. und dr Anders lachet innerlech...

Es isch eifach wie ds ganze Jahr Ostereier sueche.. und i bi im Prinzip o öppe gliich 
erfougriich - meistens isch mi Schoggihas scho haub gschmouze gsi, bis ig de ds Nästli gfunge ha!

Do-ittle!

Weme so viu hämmeret, saget, maut, umgstautet u vor auem i gwüssi Läde muess ga luege und vergliiche, de bruuchts es nöis Wort: do-ittle! (ds Verb vo Do-It-Yourself..) 
Es Wort, wo sech fest i mim Autag verankeret het...

Dr Anders isch nid für nüt uf der Leitere gstange und het am Baukongländer umepinslet - mi Ufgab isch de übrigens ds Male zwüsche de Scheieli gsi - sondern d Fertigstellig vom Baukon isch (ändlech) i Aagriff gno worde..


Ei Nami simer i Do-it-Lade u hei Houzlade kouft, nachdäm i mi drüber beschwärt ha, dass dr Baukon nach über 10 Jahr ging no nid fertig gsteut isch. Es het nume sone doofe schwarze Belag gha, wo souheiss isch worde und eim a de Füess kläbt het. U dinne het me när duurend chlini schwarzi Steinli gha.

Ungloublech, dass me 10 Jahr nüt dran macht...

Gäbigerwiis heimer no Bsuech us der Schwiz erwartet und die hei scho im Vorus ihri Fröid am do-ittle bekundet (aso eifach di einti Heufti..) u so het dr Anders afa plane u rächne. I bi froh gsi, dass ig mi us däm Projekt ha chönne drushaute (i ha natürlech bestumme, wie breit di Houzladli de müesse si u weli Farb u so...) So umegäggele fingi doof und mi Maa wots ja perfekt mache u de geits eifach lenger. U di Geduld hani nid!


Auso hei sech di Zwe ads Wärk gmacht, eine dr Chef u dr anger dr Assistänt. Und es het richtig fridlech gwürkt: kes Gstürm, keni Diskussione und erstuunlecherwiss isch das Ganze nach nume zwe Arbeitstag abgschlosse gsi.. und was söui säge: I bi sehr zfride!! Itz hani ändlech e richtige Baukon woni sogar cha dusse hocke u dinne hets es Änd mit schwarze Rübeli am Bode (und im Bett) 

Es isch würklech schön worde!

Aber natürlech isches no nid ganz fertig. Me sött itz no vo usse es Brättli befestige, damits schöner usgseht und no meh Schrube aabringe. Aber dr Anders het gseit, mir müessi itz no warte dermit, wüu sech d Brätter no müesse lege.. oder irgend so öppis.

Eh, de warte mer haut... 



P.S. Merci Päscu für ds do-ittle!

O bim Wäsche muess mes schön ha!

I has ja gseit: chuum het dr Anders Ferie, geits los mit Renoviere. 

Mir isch ja d Tapete ir Wöschchuchi scho lenger e Dorn im Oug gsi (sowieso Tapete fingi eifach doof). Auso hani bestimmt, dass dert muess gstriche wärde. Aber das allei wär ja bau z eifach gsi u drum hei hingerem Brünnli ono Plättli häre müesse. I ha dr Plan i mim Chopf gha und i ha o genau gwüsst, weli Plättli i Frag chöme; nämlech wiss u matt! Mir si dür mänge Lade, bis mer ds Passende hei gfunge.. aber das si mir üs ja scho gwöhnt vo de Eierbächer und de Fixlintüecher...

Da isch ds Team no komplett gsi..!

Guet, dr Anders het de die Plättli fachmännisch (es het ömu so usgseh) a d Wang kläbt und het d Plattefuege wöue mit emne Räst Chitt mache, wome no het vom Cheminée-Bou fürig gha. U am Cheminée gsehts zartrosa us. Auso hani sofort es Veto iigleit, es muess eifach wiss si. Wider zrügg i Lade, uswähle, vergliiche (am liebste i 3 verschidene Läde).. me kennts ja. Es isch aber när aus guet cho und de isches ad Silikon-Fuege gange. Dr Anders isch scho parat gstange u het die Fuege wöue lege u just i däm Momänt simer au di Fuege i üsem Huus düre Chopf gange, wo ig nid bi dran beteiliget gsi. I hanim auso no schnäu wöue letschti Ratschleg mit ufe Silikon-Fuege-Wäg gä: Nid z viu häretue, när mit em Finger i Abwäschmittu u schön glatt striiche.. Dr Anders het mi aagluegt u het gseit: Wosches säuber mache? :-)))

Ja, i ha di Silikonfuege gleit (wie ig das vo mim Daddy ha glert) und sogar dr Anders het müesse säge, dass es super usgseht. 

Es isch würklech schön worde!

Leider isch das no nid ds Änd gsi vor Wöschchuchi-Renovation. D Tapete het ja no abe müesse und aus het me müesse wiss striiche. Komischerwiis het mi Maa denn grad wahnsinnig z tüe gha für ds Gschäft und het nid chönne häufe. I bi aso allei uf der Leitere gstange u ha mit der Tapete kämpft. U weme einisch het müesse Tapete entferne, weiss me, werum me Tapete sött verbiete!!


I has aber nach 2 Tag de ono gschafft und ha aus schön abkläbt (abchläbe isch o sone doofi Arbeit!) und ha gstriche. Aso i ha wöue striiche, aber mi Maa het leider vergässe, Roue z choufe.. 

Schlussländlech isch die Wöschchuchi doch no fertig worde, aus schön putzt u ufgruumt, Türe entfernt... (weme uf angerhaub Quadratmeter vier Türe het, inklusive Tiefchüeler- und Putzschaft-Tür, de muess eini wäg!)

Rein theoretisch müesst me itz no d Bodeplättli uswächsle..

U itz isch aus schön putzt und ufgruumt.. wehe, es machts eine dräckig!! Zum putze hani itz nämlech gar ke Zyt, dr Anders steit scho uf der Leitere vorem Huus u maut am Baukon ume..

Mou, mir si no da!

Im Momänt isches eifach z heiss, um irgend öppis z mache, sigs im Huus oder im Garte. Mir si eifach aui am chille. 


Aber der Anders het ab hütt 4 Wuche Ferie und i weiss scho itz, dass einigi Projekt uf üs warte... löht nech la überrasche!

Vo Eierbächer u Fixlintüecher

Eigentlech hani mi ja scho fasch a aues gwöhnt hie ds Finnland. Viu Sache berchunnt me inzwüsche o hie, auerdings Thomy Mayonnaise light hei si no nid entdeckt, aber zwöi Sache schiine absolut unbekannt/unnötig z si: Eierbächer u Fixlintüecher! 

Agfange hets, womer mau zum Zmorge es 3-Minute-Ei hei wöue ässe. Mir hei i üsem Chuchischaft eifach kes passends Objekt gfunge, zum das Ei inezsteue: ds Schnapsglas isch z chli u z höch, ds Mokkatassli z gross.. es isch eifach nid gange. auso heimer ihm es Chrägli us Hushautspapier gmacht und heis so gässe (mir würde üs usgezeichnet für ds Campiere eigne!).


Churz drufabe simer auso id Läde u hei aui Gschirrabetilige dürforstet...NÜT! Mou, genau 4 Eierbächer heimer gseh, u di hei gloub e grasgrüene Osterhas druf gha.. grad gar nid nach mim Gschmack. Schiinbar isches hie so, dass me vor und nach Ostere keni 3-Minute-Eier isst, aso gits o keni Eierbächer. U weni bedänke, dass am Anders sis 3-Minute-Ei mindestens 8 Minute muess kochet wärde, damit mes cha ässe, isch mer o klar, wieso Eierbächer hie e Rarität si..


E angere Stouperstei si Fixlintüecher. Und um das Problem z erörtere, muessi e chli witer ushole, u zwar bim Bett. D Finne hei komischi Möbu! Bettgsteu und Latterost isch für die es Frömdwort und weme so öppis bi sich deheim ufgsteut het, isch me scho fasch en Attraktion ir Nachbarschaft. Me het hie sones Ding, wo grad aus i eim isch: Bettgsteu, Latterost u Matratze. Sones chlobigs Öppis. U wüus äuä unbequem isch, leit me druf ufe no es dünns Maträtzli, wo öppe nach 2 Wuche düregläge isch. U für das Machin brucht me kes Fixlintuech. Me liiret eifach es gwöhnlechs Lintuech um di dünni Uflag und guet isch. So guet gsehts aber am Morge nid us: es isch wines Nachthemmli, wo me am Morge ume Haus gliiret het.. 

Auso, i ha nöii, wunderschöni Bettwösch kouft und hätt so gärn es häugraus Fixlintuech gha..gibt es nicht! Weme Schwein het, fingt me vilech es Wiisses u das isch wahrschinlech no Frottee!


I gsehs cho, es blibt mir nüt angers übrig, aus id Ikea z fahre :-))) wüu dert hei si sicher o Eierbächer...

News usem Voguhüsli

I bi regumässig d Lag im Voguhüsli ga prüefe.. es het aube super usgseh: i am böimele und mit em Spiegu am inegluusse. U das mehrmaus am Tag. Am Afang het sech d Vogumueter (i gloube, si heisst Martha, si würkt e chli autmodisch) aube ufgregt u het dr Spiegu agfuuchet. Aber nachemne Zytli het si igseh, dass es ke Sinn het: Die chunnt ja sowieso wider cho inspiziere und macht wenn müglech no Föteli!!

U bi jedere Kontroue hets wider e chli gänderet. Einisch hani sächs gäubi Schnäbu gseh, när wider nume vier, ds nächst Mau ume füf.. i bi nid nachecho. Es isch aber eifach ones Portz gsi dert drin. 

IIh,si si eifach so schnüselig!

Letscht Sunnti hani aber de im Nästli es tots Vögeli entdeckt, wo viu chliner isch gsi, aus aui angere u äuä scho lenger nüm gläbt het. I has usegno und im Garte beärdiget. Es het schliesslech jede es Aarächt ufne Ärdbestattig.. Die angere (i weiss nid wi mängs, zwöi oder drü) hei aber busper gwürkt und me het o gseh, dass d Euter (aso d Martha u ihre Maa) viu fliissiger use si und eigentlech nonstop hei Fueter häre baggeret. U me het se sogar bis uf d Terrasse ghöre piipse. 

Gester isches de wahnsinnig närvös gsi um dä Boum ume und i bi natürlech ga ineluege. Eis vo de Vögeli isch scho ganz vorne gstange und probiert äuä, de öppe mau di erste Flugversüech z ungernäh...

Es het gloub scho chli Angst gha, aber das ungerdran isch sicher ärmer dran...

Zum Glück isches im Momänt so heiss hie, dass sech d Chatze irgendwo i Schatte verzieh, de muessi wenigstens nid dr ganz Tag näbem Boum Wach stah...

Dr Steigarte - die Zweite

Nachdäm mir das ganze Chies uf dr Ifahrt verteilt und abegstämpfelet hei, hets ke Uswäg meh gä: mir hei itz eifach müesse ds Projekt "Steigarte" i Aagriff näh. I ha di dankbari Ufgab gha, ds Gjättvlies uszlege. Es isch gar nid so eifach, wes luftet wi gstört. Aber mit chli Musig uf de Ohre und Geduld (u die isch bi mir nume begränzt vorhande) hanis gschafft. 


Es paar Tag speter heimer üs uf d Suechi nach Steine gmacht. D Wäuder si ja hie eigentlech vou  Chempe aber di meiste hei mir nid so gfaue oder si eifach z gross gsi zum umelüpfe. Zum Glück hei am Anders sini Eutere es Stück Waud (aso es isch grösser aus 3x5 Meter..) u de simer das ga dürforschte. Aso mis Outo het wider mau aus müesse gä, es isch doch würklech kes Amphibiefahrzüg aber es het Talänt! U so heimer de es paar Steine gfunge, wo üs passt hei. 

so, fertig! Ah nei, no nid..

Ja, es wär schön gsi, wes mit däm scho erlediget wär gsi. Wüu irgendwie heimer eifach nid so rächt gwüsst, wie mers söue aagattige. Mir hei zwar i jedem Garte irgend sone Steiegge gseh, wo üs no gfaue het, aber das het sech aus nid so uf üse Bitz la übertrage. U so si d Tage ids Land zoge... bis mer am Samsti hei beschlosse: So, itz! I ha Regie gfüehrt (wi immer..) u der Anders het Steine arrangiert. Mir hei Chies vom (festgstampfete) Wäg wider entfernt (...) u hei das zum Uffüue brucht. När seckwiis Härd drüber u no spontanerwiis Boumrinde a Rand. D Pflänzli hei nämlech scho gwartet vor der Hustüür. 

Ändlech!

Es isch GENAU so usecho, wie mir üs das hei vorgsteut!  Itz wärs eifach schön, wenn's würd ufhöre rägne und's ändlech e chli wermer würd, de chönnt das Züg o aständig wachse...

Dr Steigarte

Mir hei bi üs vorem Huus e Egge, wo mi scho lenger närvt. Me het dert mau vor Jahre Büsch pflanzt, wo an sich no schön wäre, wes a däm Ort im Summer nid ging so furztroche wär und nid im Winter meh aus 2 Meter Schnee würd druf lige... me gsehts cho: Es het öppis müesse gänderet wärde!! 

E Steigarte muess dert häre. I ha di wunderbari Idee gha und es isch a ds Plane gange. Am liebste hätti ja eifach scho mau aui Pflänzli kouft, wüu i chume ja grundsätzlech a kere Gärtnerei verbii..und mir schwäbt e üppig blühende Steigarte vor, mit Chüsselipflanze und so. Nid sone trochne nume mit Grüen und Greser.

Aber zersch heimer au di Büsch usglochet und witer hinger im Garte wider verlochet, wüu ganz gstorbe si si no nid gsi.U vilech gfauts ne ja dert besser.

 

so gseht d Bousteu us

Mir hei jensti Büecher bsorgt über Steigärte und hei ds Internet dürforscht, uf der Suechi nach em korrekte Ufbou. So vo wäge Drainage und so. Eis isch klar gsi: es bruucht Chies...

Nenei, i ha eh nid wöue furt fahre mit em Outo!!!

Mir schwant Böses!! Die Mängi Chies längt für wit meh aus nume mi Steigarte. Und i ha Rächt gha: 

Es isch nid so, dass ging nume dr Anders schaffet. Aber öpper muess ja fötele..

Plötzlech het me vor der Hütte e Traktor, e Maa i Arbeitschleidig und es wärde Rasekante gstoche. Für ne churze Momänt isch d Idee ufcho, me chönnt ja ono grad ds Abfauhüsli entferne, dert e chli Chies drunger tue und wider häresteue. I has grad ungerbunge, süsch wird mi Steigarte nie fertig!! 

Übrigens: ds Projekt Sunnesägu isch beändet (wär hätt das dänkt?!). U so gsehts us:

Es isch Sunnti...

Es isch Sunnti, u was macht me denn? Genau: me het es Projekt!!


I ha ir Ikea es Sunnesägu kouft, wüu i dänkt ha: "Super! Eifach zum montiere und gseht guet us". Leider hani denn grad nid dra dänkt, dass ig e Maa ha, wo gärn tuet bastle (me cha ihm itz o Tinkerbell säge)..

Ds Programm vo gester Nami isch gsi: d Fassade aaluege, mässe, diskutiere, achribele, meh diskutiere und luege, chli gäg links, chli höcher, nei vilech doch meh rächts, Sägu ufeha, wider abenäh, bohre, nomau ufeha... u das bi zimlech starchem Wind.. es isch super gsi!

5cm mache mängisch e grosse Ungerschied..

Itz isches eifach so, dass bi mire Terrasse erstens aui Möbu nüm dert stöh, womer se vore Wuche hei häregsteut, dr Stägetritt isch entfernt worde; me gheit itz auso nach der Terrasse grad ine Tuele u stouperet müglecherwiis ono grad über di rostigi Karette. Merci! Genau so hani mir das vorgsteut!! U aus nume für nes Beton-Fundamänt, wome de d Isestange würd dristeue, wo de schlussändlech ds Sunnesägu dran agmacht wird.

"Das Leben ist eine Baustelle" oder wie isch das?!

Eifach e Sunneschirm wär vilech gliich ono schön gsi...

ds Projekt "Voguhüsli"

I ha scho vor mire Reis id Schwiz am Anders gseit, dass sofort nach mire Rückkehr es Voguhüsli häre muess. Schliesslech het me das hützutags. U di arme Vögu hei niene meh Platz zum brüete (vor auem hie ds Finnland, wos so äng isch ir Landschaft..)
Eigentlech hani ja dänkt, dass är de fang würd afa, so dass mers de grad chöi ufhänke.. dä Wink mit em Zuunpfau isch leider id Hose. 


Guet, heimer das haut de gmeinsam i Aagriff gno. Aso ja, i ha gseit, wie gross ds Löchli muess si und i weli Himmusrichtig dass mers de müesse ufhänke u der Anders het gsaget, ghämmeret, gliimet, gschliffe.. u schliesslech isch das Wärk voubracht gsi und e passende Boum het chönne usgläse wärde (es het ja es paar um ds Huus). U natürlech isches wider mau angers cho, aus gmeint:

Leo:"Darfi itz o mau?!"  Bibi:"Psst, I muess mi itz konzentriere!"

Super, ob äch da irgend e Vogu wott ga wohne??


Vor es paar Tag hani mau us Gwunder dri gluegt, und siehe da:

I ha se auso zeut: es wärde Achtlinge!! Und i steue mer itz scho vor, wieni probiere, d Chatze dinne z bhaute u gliichzytig bi de erste Flugversüech hiufe...

I wirde zum Blogger!!

Nachdäm i ja scho mehrmaus Newsmail ha verschickt, aber die ging säutener si worde, hani mi entschlosse, is mau mit emne Blog z probiere. 

Es git ja eigentlech ging öppis z verzeue über mis Läbe hie im höche Norde (so höch isch dä im Fau gar nid): über grösseri u chlineri Missgschick, Projekt im und um ds Huus, wobii i ja meistens gueti Idee ha u när nume no befile, mini Fortschritte im Kampf mit der finnische Sprach...


U i ha sicher o ging öppe es Föteli oder zwöi für öich :-)