Eigentlech hani mi ja scho fasch a aues gwöhnt hie ds Finnland. Viu Sache berchunnt me inzwüsche o hie, auerdings Thomy Mayonnaise light hei si no nid entdeckt, aber zwöi Sache schiine absolut unbekannt/unnötig z si: Eierbächer u Fixlintüecher!
Agfange hets, womer mau zum Zmorge es 3-Minute-Ei hei wöue ässe. Mir hei i üsem Chuchischaft eifach kes passends Objekt gfunge, zum das Ei inezsteue: ds Schnapsglas isch z chli u z höch, ds Mokkatassli z gross.. es isch eifach nid gange. auso heimer ihm es Chrägli us Hushautspapier gmacht und heis so gässe (mir würde üs usgezeichnet für ds Campiere eigne!).
Churz drufabe simer auso id Läde u hei aui Gschirrabetilige dürforstet...NÜT! Mou, genau 4 Eierbächer heimer gseh, u di hei gloub e grasgrüene Osterhas druf gha.. grad gar nid nach mim Gschmack. Schiinbar isches hie so, dass me vor und nach Ostere keni 3-Minute-Eier isst, aso gits o keni Eierbächer. U weni bedänke, dass am Anders sis 3-Minute-Ei mindestens 8 Minute muess kochet wärde, damit mes cha ässe, isch mer o klar, wieso Eierbächer hie e Rarität si..
E angere Stouperstei si Fixlintüecher. Und um das Problem z erörtere, muessi e chli witer ushole, u zwar bim Bett. D Finne hei komischi Möbu! Bettgsteu und Latterost isch für die es Frömdwort und weme so öppis bi sich deheim ufgsteut het, isch me scho fasch en Attraktion ir Nachbarschaft. Me het hie sones Ding, wo grad aus i eim isch: Bettgsteu, Latterost u Matratze. Sones chlobigs Öppis. U wüus äuä unbequem isch, leit me druf ufe no es dünns Maträtzli, wo öppe nach 2 Wuche düregläge isch. U für das Machin brucht me kes Fixlintuech. Me liiret eifach es gwöhnlechs Lintuech um di dünni Uflag und guet isch. So guet gsehts aber am Morge nid us: es isch wines Nachthemmli, wo me am Morge ume Haus gliiret het..
Auso, i ha nöii, wunderschöni Bettwösch kouft und hätt so gärn es häugraus Fixlintuech gha..gibt es nicht! Weme Schwein het, fingt me vilech es Wiisses u das isch wahrschinlech no Frottee!
I gsehs cho, es blibt mir nüt angers übrig, aus id Ikea z fahre :-))) wüu dert hei si sicher o Eierbächer...
wi gseit, mach ä ichoufsliste! ;-)
AntwortenLöschenjaja, die isch scho am wärde :-))
AntwortenLöschenBiber -Bettwösch muesch ha... schiint mer doch echli es Entwickligsland zsi. Guet bisch du dert und chasch echli helfe ... bisch halt e Pionirin und gosch öppe no i Gschicht i.
AntwortenLöschenMer hend emol im Kidsch us Eierkarton Eierbecher gmacht. Aber wohrschiinlich gits au kei Eierkarton i dem Land. Puh du hesch mis Mitgfüehl.
Liebie Grüess sTanti
ah Tanti, sone cooli Idee mit de Eierkarton!! Die gits hie sogar. Aber isch haut nume e Notlösig.. muess gliich id Ikea :-))
AntwortenLöschenIsch scho guet, weme russischi Familiemitglieder het.. die wüsse sech no z häufe..
Jo gell... mer Russinnen kennet halt die Entbehrige und sind sooo innovativ! Aber i dIKEA muesch eh... bi grad ltschte Friitig gsi. Isch scho cool. Sie hend eifach alles au Zügs wo ni bruuchsch aber garantiert.
AntwortenLöschenI chönnt der natürlich au es paar Eierbecher töpfere! Das wär denn es netts Wiehnachtsgschänk :-)
Und sösch ghots dr guet? Hend er warm?